كلمات اهو ده اللي صار مكتوبة
أهو ده اللى صار
و عشقت قلبك و السلام
ولا حيلتى كام
ولا عندى بيت
ولا لسه راجع مالكويت و الجيب تمام
كل الحكايه بإنى حبيتك كده
من غير كلام
عالحب و الليل و الفضا
ولا حسبه بايخه معقده
و مقارنتك بما قد مضى
ولا حتى زينت العيوب
بالإصطناع و الفضفضه
لا انا كنت والى ف قصتى
ولا عوزت قطه مغمضه
و برغم إنى مريض بفوبيا الإشتياق
و الحب ياما بقلبى ضاق
قلبى إبتسملك و إرتضا بالحب داء
كل الحكايه بإنى حبيتك كده
فطره و غباء
و قطعت نفسى بدون مبرر للسباق
و لإنى مش ناقص فراق
خبيت مخاوفى فضحكتك و ضحكتلك
علشان مشاعرك ماده خام للإحتواء
و عنيكى طيش
يا أيها البنت التى إتنفسها قلبى عشان يعيش
إذا كنتى عايزانى أشتريكى ب كاس
و طقم نحاس و نيش
فا ماتزعليش
أنا قلبى ساء الإختيار
و إذا كنتى راضيه بقلب ماس
رغم إنه متكلفت ب خيش
او خايفه خوفى يكون حصار
تفتقدى فيه الإهتمام
او خايفه أخاف آخد قرار
او خايفه منى بشكل عام
فا أنا جيت أقولك ماتخفيش
أهو ده اللى صار
و عشقت قلبك و السلام
